دوهمه برخه
رشيد احمد
د مجلې ګڼه:۱۲مه
د مجلې د چاپ نېټه: اکتوبر- مارچ۱۷- ۲۰۱۶
۲۔ د ښاغلي فضل معبود صائم "د سبا پلوشې"
"دسبا پلوشې"د ښاغلي فضل معبود صائم وړومبۍ شعري ټولګه ده. د کتاب ټائټل ښائسته اورنګين دی اوپه وروستی يعني بيک ټائټل ئې رنګين تصوير د ښاغلي اباسين يوسفزي دپېژندګلو سره چاپ دی. داکتاب ۱۴۶ مخونه لري. قيمت ئې مناسب دی. ښاغلي فضل معبود صائم په دې مجموعه ډاکټر شيرزمان سيماب،ښاغلي شهباز محمد،سيد صابر شا ه صابر ليکل کړي دي.
ما چي کله دليکوال شاعري اولوستله نو فکر مي دليکوال خپلو خبرو ته لاړ و چي هغه ددې شعري ټولګي په هکله ليکلي دي. په نهم مخ ليکي چي ما کله خپل شعرونه دملګرو په وېنا راغونډ کړل نو پروفېسر محمد نواز طائر او درياب صېب ته مي دڅوکرښو دليکلو دپاره ورکړه نوهغوئ راته اووې چي اوس ئې مۀ چاپ کوه. نو بيا چي کله اکثرو ملګرو مجبور کړم او شاعري مي راغونډه کړه۔ دې خبري زۀ هم وهڅولم چي داسي څۀ وجه کېدائ شي چي پروفېسر محمد نواز طائر صېب او درياب صېب دوئ منع کول چي شاعري نه چاپ کوي يا صبر اوکړي. او يودوه کرښي قدري ئې پرۀ او نۀ ليکلې. کېدائ شي چي دواړه محترم ددوئ د شاعرۍ دموضوعاتو سره او يا ئې نظرياتي اختلاف له کبله داسي کړي وي. هرڅه چي وي هر څوک دخپلي مرضۍ خاوند دی. خپل ذهن او فکر لري. ما چي دصائم صېب شاعري اولوستله نو ډېره راباندي ښۀ اولګېدله.
په دې شعري ټولګه کښي پنځه نعتونه،څلور مرثئې چي د کربلا،صاحب شاه صابر،محترم اجمل خټک،محترمي بې نظير اوخپلي مور په مړينه ئې ليکلي دي. په پېښور کښي د دهماکو،اې پي ايس،باچاخان پوهنتون دناوړه پېښو په هکله نظمونه، زوی ته نصيحت، ماحولياتو او داسي نورو موضوعاتو ښائسته ښائسته نظمونه ليکلي دي. د کتاب په سر کښي د سريزو نه وروستو اول څلور نعتونه دي چي د نبي عليه سلام سره د ميني، عقيدت، احترام او نيکو پيرزوينو غوره نمونې دي. ددې نه وروستود وړومبي نظم عنوان دی"سواتيان کډه په سر". په دې نظم کښي ښاغلي ليکوال د سوات دخلګو د بې کوره کېدلو يوۀ ډېره غمجنه او افسوس ناکه نقشه راښکلې ده. په دې نظم کښي ليکوال دسوات داولس عموماً او دخپلو دوستانو د شړونتيا،بې کوره کېدلو،اودر په در ګرځېدلوذکر کړی دی. د حالاتو ستم ظريفي ئې بيان کړې ده. ددې نظم څو شعرونه د نمونې دپاره وړاندي کوم.
لکه چي وائي:
لکه مرغۍ چي شي خورې ورې د ډز سره
داسي سواتيان نن څوک په لر او څوک په بر ګر ځي
هغه د سوات د يو بې وسه مور نه څۀ خبر دی
هغه خو راشي په هوا په جهاز کښي بر ګر ځي
لاړو د سوات حسن ظالمو سترګو اووهلو
اوس د سوات حسن په مردان او پېښور ګرځي
دموجوده ناورين او غير يقيني حالاتو په هکله دا يو نظم " سړی چرته لاړ شي؟" دلوستلو سره تعلق لري
لکه چي وائي:
موږ خو وې مياشت نيمه کښي هر څۀ به خپل ځائ له راشي
د دې حالاتو درېيم کال دی سړی چرته لاړشي
د ا چي د امن دعوېدار دي او نظام بدلوي
زما ترې دا وړوکی سوال دی سړی چرته لاړ شي
ددې نه علاوه ښاغلی فضل معبود صائم روماني شاعري هم کړې ده چي دلوستلو او محسوسولو سره تعلق لري. ښاغلی فضل معبود صائم دنوي او ځوان کهول شاعر دی. شاعري ئې د خوږوالي سره سره دخوږ زړۀ دارو هم لري. ددوئ داکتاب دپښتنو په سيمه دپېښو او واقعاتو تاريخ هم دی، په هغې ژړا هم ده تپوس هم دی. ددوئ دامجموعه درد او درمان دواړه لري. زۀ خبره نۀ اوږدوم. تاسو دادواړه کتابونه واخلئ وئې لولئ او خوندونه ترېنه واخلئ. زۀ خپلي خبري د صائم په دې څو شعرونو ختموم.
ما وې چي ډلي ډلي لېوني ګرځي څۀ چل دی
خبر شومه چي دلته لېونۍ په خوب اوده ده
بېګا مي خوب ليدلو چي په پورته کډي تللي
چولۍ ئې وه اغوستې يو کوچۍ په خوب اوده وه
صائمه چرته ګرځې راشه دا حسن خو ووينه
پخپله به وې دا چي شهزادګۍ په خوب اوده ده