مناجات
عادل اڅکزی
د زړۀ پر سپينه پاڼۀ الهامونه راپيرزو کړه
خالقه! د ثنا دي څو لفظونه راپيرزو کړه
تور کڼي د باطن چي پخپل نور باندي راپرېولي
د ميني له کوثره ډک جامونه راپيرزو کړه
د غېرو تر اثر لاندي راغلي يو نن واړه
په وړانګو د رحمت کښي ګل وختونه راپيرزو کړه
خوځون پر چپه خوا خو سړی بيائي ناکامي له
پر لاره د عمل مثبت ګامونه راپيرزو کړه
بې ياده دي شېبې د ژوند عبث بنده ګڼمه
د ساه په تلو راتلو کښي خپل ذکرونه راپيرزو کړه
نوم ورکښي عريضه ده، ستا و دۀ ته نن راوړې
لاس ليک د رضا غواړي رخصتونه راپيرزو کړه