بهارناصر
د مجلې ګڼه:۱۳مه
د مجلې د چاپ نېټه : اپريل تا ستمبر ۲۰۱۷
د هم دې ښارګوټي سبزي مارکېټ له بازار څخه يو طرف ته وتلی د لاريو او بسونو د تم ځائ (اډې) تر څنګ په يوه تنګه تنګوړۍ هوېلۍ کښي ؤ. ځکه به د ښار خلګو نۀ شو کولائ چي د کور په يو سېر سبزي پسې د بازار هغه بل پلو کښي جوړ کړ شوي سبزي مارکېټ ته لاړ شي. دوهم دا چي سبزي مارکېټ په يوه تنګه هوېلۍ کښي ؤ په دې تنګه تنګوړۍ هوېلۍ کښي به د زمانو زمانو ورستې مېوې او کچرې په هر لور خورې ورې پرتې وې چي د بد بوئي له زوره به ئې د بني آدم ساه بندېده.
بله لا دا چي په سبزي مارکېټ شاوخوا د لاريو، بسونو ګڼه ګوڼه، هرنان، شورماشور او ټريفک ؤ. د سبزي مارکېټ يو روډ هم په ډامبر نۀ ؤ پوخ کړ شوی. او نۀ ئې هم د سړکونو د غاړي د خرابو اوبو چرۍ په سيمټو پخې شوي وې. ځکه به دا روډونه په عامو ورځو کښي د تورو ځرڼو رودونه وو او د بارانونو په ورځو کښي به د خړو اوبو په روانو نيزونو بدل شول.
کال په کال چي د لاريو، بسونو، ګڼه ګوڼه زياتېده، نوره تنګائي جوړېده. بدبوئي ورځ په ورځ وده کوله هم داسي ورو ورو د سبزي مارکېټ څخه د خلګو ناټ ماتېدو. اوس نو خلګو د سبزي ضرورت په بازار کښي له ګرځنده سبزي رېړيو پره کاوه. د بازار په هر سړک، هر مارکېټ کښي دګرځنده سبزي رېړيو شمېر ورځ تر بلي زياتېدو.
دغه سبزي رېړۍ به غرمه ناوخته او ماسپښين ته نژدې وخت د بازار هغو ځايونو ته ځان ورساوو له کومو ځايونو چي به د ښار څخه ليري پرتو کليو ته موټرونه وتل.کليوالو به نوري سوداګاني له بازار څخه پره کړي وې. د خپل کلي موټر ته به ئې ځان راورساوه او د موټر د روانېدو پر وخت به ئې ژر ژر د کلي له موټر سره نژدې ولاړي رېړۍ څخه سبزي وتلله او موټر ته به وختل.
د ماسپښين د لمانځه پر وخت به له دغو وړو وړو اډو څخه ټولو رېړيو د بازار غټو غټو مسجدونو دروازو ته ځانونه ورسول. چي کله به لمانځيان د جمي ماتېدو وروسته له مسجدونو څخه راوتل نو د مسجدونو هري دروازې ته به لس لس پنځلس پنځلس د سبزي او مېوې رېړۍ ولاړي وې. رېړۍ والو به هر يوه ګراک په کرېږو کرېږو خپلي رېړۍ ته متوجه کاوه.
"راشئ راشئ د علاقې سبزي، تازه سبزي، خوږه سبزي، وائې خلئ سادګانو پر مخ مۀ تېرېږئ".
هغه بل به چيغه کړه" تنکي بادرنګ، د ږوبک بادرنګ، د نورنګ بادرنګ رنګ رنګ بادرنګ رنګ رنګ بادرنګ".
"وړيا به ئې وړي، رښتيا به ئې وړي، حاجي صاحب دهوکه نۀ شې، ګوره ساده نۀ شې ګوره".
هغه بل به له هغي بلي خوا نعره کړه" ټماټر واخله حاجي ګله، بانجړ واخله، مارو کدو به وړې د علاقې بېنډۍ يوسه ښې بېنډۍ يوسه".
" تور کولو واخله، ګنې شين کولو واخله، ګنې انارخوږ به در وتلم ډاکټران ئې خوښوي، هوښياران ئې خوښوي کاکا مۀ تېرېږه پر مخ ".
په دغه شورماشور کښي به د ماشومانو سبزي فروشو، ځوانانو، د پاخه عمر دکسانو او سپين ږيرو ګډ وډ ږغونه او کرېږي اورېدل کېدې. هم داسي به دغو نعرو بغارو دومره بد شور جوړ کړی ؤ چي زړۀ به دي غوښتل چي خپلو غوږونو کښي ګوتي ونيسم اوپه منډه د سبزي رېړيو تر حدوده ځان وباسم.
د ماسپښين د لمانځه پس به دغو رېړيو يو ځل بيا په منډه منډه ځانونه دبازار هغو ځايونو ته ورسول له کومو ځايونو چي به نسبتاً نژدې پرتو کليو ته موټرونه وتل. دا رنګي به يو ځل بيا د بازار په هر ښکر کښي دګرځنده سبزي رېړيو مارکېټونه ودرېدل. د مازيګر او ماښام دلمنځونو په وخت به يو ځل بيا د مسجدونو دروازو ته د مېوې او سبزي مارکېټ تود شو. د ماښام له لمانځه وروسته به د سبزي رېړۍ له بازار څخه ورکي شوې او د مېوو رېړيو به زور واخستو. د بازار هر هغه پلو چي چېري به د انسانانو ګڼه ګوڼه لږ زياته وه هلته به د سړک دواړو غاړو ته د مېوې د رېړيو بازار ولګېده.
"راشئ ناخبرو، وائې خلئ ارمان به وکئ". نيلام مال ،نيلام مال، نيلام مال مست شپتالو په نيمه بيه، شپ شپ مۀ کوئ شپتالو وتلئ".
"خوند ئې ګورئ بيا ئې وړئ، خوند ئې ګورئ بيا يې وړئ، پېوندي ژړدالو پيوندي ژړدالو".
هغه بل به چيغي کړې"خمار انګور، خمار انګور، اې ناخبرو راشئ وائې خلئ، مست انګور واخلئ، د ويني فشار ختموي، د خېټي وازګه ويلوي، د غوټو بدنو په کمولو کښي مرسته کوي، د ورزش له تکليفه مو خلاصوي، د هرټ اټېک امکانات کموي، د شوګر علاج د کينسر علاج خماري انګور خماري انګور، راشئ چي در وئې تلم، انګور نۀ دي د هر مرض علاج دی، يوئې سئ. نا خبرو!" بيا به ئې وروستو سوکه پسې ووئيل"خېټورو!، پتنورو!"........
د ښاروالۍ او ضلعي انتظامئې نا اهلي چي د سبزي مارکېټ ئې په نامناسب ځائ جوړ کړی ؤ دا پايله ورکړه چي دا وخت په سلګونو سلګونو ګرځنده سبزي رېړۍ په بازار کښي ګرځېدې راګرځېدې. دغو سبزي رېړيو نۀ يوازي په بازار کښي ټرافيکي خنډونه پېدا کول بلکې د بازار هر دوکاندار ئې هم تر پوزي راوستی ؤ. رېړيوال ټول بې سواده او بې تعليمه خلګ وو چي نۀ خو د بازار په اصولو او نۀ هم د ټرافيک له قوانينو خبر وو. په هر پنځم قدم به د بازار سړکونه د رېړيو د لاسه د ټرافيک پر مخ ايسار ؤ. ځائ په ځائ به د دوکاندار او رېړيوال تر منځ نښته روانه وه. ولي دوکاندارانو نۀ خوښول چي د دوکان تر مخ ئې رېړۍ ودري او دوکان د ګراک له نظره الونيا کړي.
دا چي د بازار ټول نظم د رېړيو او رېړيوالو له کبله ورځ په ورځ خرابېدو ځکه به د بازار هر سړي رېړيوالو ته ډېر په سپک نظر کتل. د رېړيوالو کېس ورځ په ورځ کمېدو. له دوئ څخه نۀ دوکاندار سپکه وېنا سپموله، نۀ موټروانانو او نۀ هم د بازار پياده خلګو. خو رېړيوالو له دغو خلګو سره ښه مقابله کولائ شوه. يو ښکنځل به ئې په پنځويشت ښکنځلو ور ځواب کاوو. د ځان ښکنځل به ئې د ښځي په ښکنځل وربدلاوو، د ښځي ښکنځل به ئې د مور خور په ښکنځل او د مور خور ښکنځل به ئې د انا، مامۍ، ترورۍ او توړۍ او د ټول خاندان په ښکنځل وربدلاوو.
دا خو د عامو خلګو سره د رېړيوالو مقابله وه چي رېړيوال به زياتره په دې مقابله کښي بريالي راوتل. ولي چي هر سړي نۀ غوښتل چي د رېړيوالو سره د سپکو او ښکنځلو سلسله د خپل ګرېوان تر شکېدلو ورسوي. هر رېړيوال به د خپل ګرېوان يا د بل ګرېوان شکولو ته چمتو اوسېدو. ولي چي دوئ خپل غربت او ناچارۍ دې ته مجبور کړي وو.
په دې بازار کښي چي کومه تايپه د رېړيوالو په سيالۍ پره وه هغه يوازي د ټرافيک پوليس وو چي هم ئې په ماغزو کښي د ښکنځلو زخيره د رېړيوالو په نسبت زياته وه هم د تعليم، تهذيب او اخلاقو له اړخه له رېړيوالو سره همسري وو.
د رېړيوالو په نظر کښي د مځکي پر مخ يوازينی د جدال لښکر ټرافيک پوليس وو چي د دوئ په ذهنونو ئې ابدي ترهه او وېره ننه يستې وه. د ټرافيک پوليسو نۀ يوازي د کوتک په زور له رېړيوالو څخه نغدي روپۍ جېب ته کولې بلکې د کور سبزي او مېوه ئې لا هم مفته له دوئ څخه تروږله. زياتره ټرافيک پوليس چي به تا چېري هم په بازار کښي ليدل، شخوند به ئې واهه او ژامي به ئې په کېله، انګور، مڼه، انار، ژړدالو، شپتالو يعني په يوه نه يوه مېوه ښورېدې. د ټرافيک پوليسو لاس د چا بابک هم نۀ شو پرې ورچرموړلائ. د دوئ خوښه چي کومي رېړۍ ته لاس ورغزوي او کوم شی ترې د خوړلو لپاره پورته کوي.
کله چي به کوم پوليسوال ته کوم رېړيوال په نغدو پيسو، سبزي يا مېوې انکار وکړ هغه به هغه دم تاڼې ته اطلاع وکړه چي دلته يو رېړيوال د ټرافيک اصولو خلاف ورزي او ګستاخي کوي. نو سم دستي به د پوليسو موټر راورسېدو او رېړيوال به ئې له ډکي سبزي رېړۍ سره تاڼې کښي بندي کړ. دوې درې ورځي به ئې په تاڼه کښي کښېناوه. سبزي به ئې په تاڼه کښي ورسته او بوئينه شوه. مېوه به ئې د تاڼدار صاحب او د تاڼې د پوليسو خوراک شوه. درېيمه ورځ به له درنې جرمانې پرېکولو، سزا خوړلو او نابلده نابلده ښکنځل عضمولو وروسته خوشي کېدو.
دا وخت په بازار کښي دګرځنده سبزي رېړيو شمېر څلورنيم، پنځه سوه ته رسېدو. کله چي د ټرافيک پوليسو دغه ناروا رويه خپل اخري حد ته ورسېده نو رېړيوال په دې مجبور شو چي دوئ هم د دوکاندارانو په څېر يو انجمن او اتحاد جوړ کړي. چي د پوليسو د جبر څخه د خلاستون د پاره يوه منظمه نعره پورته کولائ شي. د انجمن د جوړولو رائې بوږ واخست او په رېړيوالو کښي ئې په يوه اوونۍ کښي دننه دننه دومره مقبوليت پېدا کړ چي لسمه ورځ دوئ د اتحاد د کابينې چوڼ اعلان کړ.
په اتفاق سره په شپږو کسانو مشتمله کابينه جوړه شوه. صوفي صادق صدر وټاکل شو چي دوئ به مشر ورته وئيل. پنځه کسان نور دوئ له صوفي صادق سره د ملا تړليو په نامۀ ونومول. او پاتي څلورنيم، پنځه سوه رېړيوالو ته د لښکر نوم ورکړ شو.
رېړيوال ټول د غريبي طبقې خلګ وو. دغه د ورځي مزدوري ئې د ماښام د خُلې ګوله وه. سهار ګټلي ماښام څټلي د دوئ ټوله هستي نېستي وه. مګر صوقي صادق په رېړيوالو کښي هم تر زياترو لا زيات غريب وو. خو هغه د چا خبره له غېرته لکه وچ لرګی اووه ځايه ماتېدو.
صوفي صادق مزی پېچلی د درميانه قد دېرش کلن ببر ځوان ؤ. ګڼه ببره ږيره، تور بخنه سرۀ څهره، څپولي څپولي ببر سر، زېړ زېړ د سګرټو لوګي وهلي غټ غټ غاښونه به ئې اکثره ډېر له ليري ښکارېدل. دی يو ډېر خوش طبعه، خنده رويه او ټوکي ځوان ؤ. د دۀ د حاضر جوابي ساری په ټول ښار کښي نۀ پېدا کېدو. دۀ به د هري وړې غټي خبري ځواب په ټوکه کښي کاوه. مګر په تند خوئ او جنګ جګړې کښي ئې هم ساری نۀ لاره. دۀ به اکثره د خپلي څهرې رنګه توربخن کالي اغوستل چي د دوړو او خريو د لاسه به د دۀ تر څهرې يو څه مقدار زيات توربخن ښکارېدل. سرۀ سيندهي خولۍ به ئې چپه په سر ايښې وه. کُورته کالي به ئې کول. د مخ جېبونه به ئې نۀ درلودل. مګر د قميص دواړه خواته به ئې د څنګ جېبونه د بغل جولو په رنګه ډک ډک پرې زړېدل. يو خدائ خبر چي دۀ څۀ پکښي ساتل خو دغه جېبونه به ئې هر ګړی ډک ډک معلومېدل. پلن ټټر به سينه کښلی چابک چابک لکه د کوترو نر تر خپلي رېړۍ په غومبر راګرځېدو. او نعرې به ئې وهلې. د ګرېوان څلور سره تڼۍ به ئې خلاصي ساتلې. دا رنګه به ئې د سينې د وېښتانو تور ځنګل ډېر له ليري خلګ وېرول. اکثره وخت به ئې سګرټ په لاس کښي تر خُلې او سپږمو تور، شنه لوګي ايستل.
په زرګونو زرګونو نابلدي ښکنځاوي د دۀ زباني يادي وي. شايد په دغو نابلدو ښکنځاوو کښي زياتره د دۀ خپل تخليق وي او هر قسمه حقوق ئې له دۀ سره محفوظ وو، ولي دغه ښکنځاوي بل د هيچا په ژبه هم نۀ شوې راوړل کېدائ. دۀ د ټوکو په جامه کښي د ښکنځلو کاچاک ښه په هنر د خلګو د برداشت تر ستوني تېرولائ شو.
پوليسو ته دی د توري بلا په معنا وو. اکثره هغه پوليس کوم چي به په پښتو سم نۀ پوهېدل هغه به له صوفي څخه پټ تېرېدل. ولي چي که به ورسره مخامخ شول نو صوفي ئې په ټوکو ټوکو کښي مور، خور، ښځه، ترور، توړۍ ، مامۍ، خورزې، ترلې، او خورلڼي ټولي ور وښکنځلې. نور رېړيوال به له خندا شنه شنه پرې کېدل. پوليس وال به حيران وو چي دا اوس کومي بدلي راپوري بولي چي بازار ئې ټول راباندي وخنداوو. او نۀ به پوهېدل چي څۀ ردعمل ورسره وکړي. دغه وجه وه چي پنجابي پوليس به له صوفي صادق څخه په بازار کښي پټ تېرېدل. د صوفي صادق له رېړۍ سره نژدې ولاړو رېړيو ته به لا هم د پوليسو له خوا خير خيريت وو. پوليسو دومره جرات کولی نۀ شو چي د صوفي صادق سره څنګلورو رېړيو باندي ښه يا بد کار ولري. په ټرافيک پوليسو کښي صوفي صادق د ببر بلا يعني د ببري بلا په نامۀ مشهور ؤ.
کومه ورځ چي چوڼ وشو نو صوفي او پنځو ملا تړلو ملګرو ئې خپلي رېړۍ نورو ملګرو ته حواله کړې. دوئ شپږ سره په بازار کښي په يو بل لور ووتل. کرۍ ورځ په رېړيوالو پسې ګرځېدل. کوم ځائ چي به ئې درې، څلور رېړيوال وليدل هغه به ئې سره راټول کړل. د پلان شوي تګ لاري ټول ترتيبات او جزيات به ئې ورسره شريک کړل. دا رنګي دا رابطه مهم په دوې درې ورځې کښي پائ ته ورسېدو.
بله ورځ صوفي صادق ټول بازار په پنځه برخي ووېشو. پنځه سره ملا تړلي ئې په پنځه لوره ځله تشکيل کړل. چي هر رېړيوال ته د سبا د احتجاج خبر ورکړي. د ماښام د لمانځه وروسته پنځه سره ملا تړلي صوفي صادق ته راورسېدل او ډادګېرنه ئې ورکړه چي اوس په بازار کښي يو هم داسي رېړيوال پاته نشته چي هغه ته دي د احتجاج خبر نۀ وي رسېدلی.
سبا ورځ د ښار او بازار ټول خلګ حيران، پرېشان وو. ولي چي د بازار په يو پلو کښي هم د سبزي او مېوې رېړۍ نۀ تر سترګو کېده. رېړيوال ټول په بازار کښي په يو بل لور تېز تېز ځغلېدل راځغلېدل. هيچا ته ئې هم حال نۀ وايه. رېړيوال لکه د ګودام موږکان بې واره په يوه بله سوړه ننوتل راوتل. د چا هم سر نۀ خلاصېدی چي اخر کومه پيشۍ چا وژلې ده چي د رېړيوالو په لکيو اور بل دی.
نن بازار ټول بدل بدل غوندي ښکارېدو. موټروانان خوشحال وو چي د بازار ټول واټونه نن له رېړيو پاک وو. پوليسوال حيران وو چي اخر څۀ وجه ده چي رېړۍ داسي په يوه ورځ له بازار څخه غائبي شوي دي. خلګ په سبزي او مېوې پسې کړانده ګرځېدل. د غرمې تر يولسو بجو هم دغسي د حيرانۍ فضا وه. يو څه شېبه پس د بازار په منځنۍ څلورلاري (چوک) کښي يو دم نعرې، بغاري او کرېږي پېل شوې. څلورنيم پنځه سوه رېړيوالو څلور لاره بنده کړه.
په دوئ کښي له دوولس کلنو هلکانو واخله تر پنځه اوويا کلنو سپين ږيرو، د هر عمر رېړيوال شامل وو. د څلور لاري په عين وسط کښي يو ببر ځوان د خلګو له منځه راښکاره شو چي په يوې تشي رېړۍ کښي بره ودرېدو.
ببر ځوان نعره کړه."ناروا پولس ناروا پولس". (ناروا پوليس ناروا پوليس)
رېړيوالو په يوه ږغ ورځواب کړه."مخ ئې پراته شا ئې راته".
ببر ځوان بيا نعره کړه."ناروا پولس ناروا پولس".
رېړيوالو بيا په يوه ږغ ورغبرګه کړه."مخ ئې پراته شا ئې راته".
ببر ځوان."زاليم ووکمت، هرام خور ووکمت". (ظالم حکومت حرام خور حکومت)
رېړيوال."تو نالت تو نالت". (تهو لعنت تهو لعنت)
ببر ځوان، "زلي انتزامه زلي انتزامه" (ضلعي انتظاميه ضلعي انتظاميه)
رېړيوال،"مړداباد مړداباد" (مرده آباد مرده آباد)
ببر ځوان،"پلټيکل اجېنټ پلټيکل اجېنټ" (پوليټيکل ايجنټ پوليټيکل ايجنټ)
رېړيوال،"مړداباد مړداباد"
ببر ځوان،"اسټن پلټيکل اسټن پلټيکل" (اسيسټنټ پوليټيکل ايجنټ اسيسټنټ پوليټيکل ايجنټ)
"مړداباد مړداباد"
ببر ځوان."زاليم ووکمت هرام خور ووکمت"
رېړيوال."تو نالت تو نالت".
ببر ځوان ."ناروا پولس ناروا پولس".
رېړيوال."مخ ئې پراته شا ئې راته".
له دغو څو کلکو نعرو پس، پر ځائ د دې چي ببر ځوان خپله وېنا پېل کړي، له رېړۍ کښته راټوپ شو. او په يو سيکنډ کښي يو بل ځوان له کښې رېړۍ ته ور لک شو. په سر ئې ودرېده.
کرېږه ئې کړه."سوپي ساديک سوپي ساديک". (صوفي صادق صوفي صادق)
رېړيوال."زنداباد زنداباد" (زنده آباد زنده آباد)
"سوپي ساديک سوپي ساديک".
"زنداباد زنداباد"
بيا دستي دغه ځوان هم له رېړۍ کښته راټوپ شو. او په يو ساعت کښې رېړۍ ته له کښې لوره لاسونه ورلاندي شول. رېړۍ ئې لکه د جنازې کټ له مځکي پورته کړه. بيا ئې د الله اکبر له نعرې سره د مځکي په لور راپرېښوده. رېړۍ کړس پر پاخه سړک ولګېده. يو ځل ئې بيا پورته کړه او د مځکي پر لور ئې راپرېښوده"الله اکبر" رېړۍ کړس پر پاخه سړک ولګېده، ټکړې ټکړې شوه. بيا ئې هره ټکړه جلاجلا پورته کړه، له مځکي ئې وويشته. دارنګه ئې رېړۍ ټوټې ټوټې کړه.
دغه وخت له څلورنيم، پنځه سوه رېړيوالو پرته په سلګونو سلګونو د بازار خلګ هم د احتجاج نندارې ته رارسېدلي وو. اکثره رېړيوال خشمېدلي او قهرېدلي معلومېدل. خو ځيني پکښي داسي هم وو چي يوازي خنداګاني او چړچکي ئې کولې. ځينو پکښي شپېلکي وهل او ځينو لا ببکۍ پکښي کولې نورو بيا خپلي خولۍ او څادرونه او دسملونه په هوا کښي غورځول.
له لومړيو څلورو پنځو نعرو وروسته احتجاج سمدستي بد نظمه شو. د هيچا خبره نۀ اورېدل کېده. چيغي، نعرې، بغاري، شپېلکي او ببکۍ وې چي بازار ئې پر سر اخستی ؤ.
په دغه وخت کښي د ورځپاڼو، رېډيوګانو او ټيليويژنونو رپورټران هم راورسېدو. له خپلو کېمرو سره د دوکانونو تړيو او بامونو ته وختل، خپلي کېمرې ئې د احتجاج په لور برابري کړې.
څه شېبه پس يوه بله رېړۍ هم د احتجاج کونکو منځ ته راننه ايستل شوه. رېړۍ ته يو اوږد د اوسپني زنځير واچول شو. د ماتي کړې شوي رېړۍ ټوټې هم په دغه رېړۍ کښي واچول شوې. خلګو ئې له يوه بل لوره ننداره کوله د هيچا هم سر نۀ خلاصېدو چي له دې پس احتجاج کومه بڼه خپلوي.
په دغه وخت کښي يو جذباتي ځوان د پيټرولو ډک ګېلن په لاس کښي په خلګو راګډ شو. ژر ژر ئې ګېلن خلاص کړ. په رېړۍ ئې شاوخوا پيټرول توئ کړل. بيا ئې له خپل جېب څخه اورلګيت راو ايستو او دانه ئې ټک وهله. د دانې له ټک وهلو سره سم لومړۍ پر رېړيوال او بيا په رېړۍ سرۀ لمبه وغوړېده. نور رېړيوال خواشا وغورځېدل. په کوم رېړيوال چي لمبه بله شوه هغه شالوره پسې وغورځېدو. سرۀ لمبه وه چي په سړک ئې منډي وهلې. دغه ګړۍ لا سوي کرېږي پېل شوې. "فضل خدايه فضل خدايه، توبه خدايه توبه خدايه". له هر لوره د فضل فضل نعرې وهل کېدې.
څو رېړيوالو په اور اخستي رېړيوال ملګري پسې له شا منډي کړې. د خپلو څادرونو په ذريعه ئې اور ځني مړ کړ. مګر اور اخستی رېړيوال تړپ په سړک راونړېدو، بې هوشه شو. نژدې ولاړ موټروان خپل موټر ته واچاوه، موټر ئې چټک د روغتون په خوا وغورځاوه.
ځينو ملګرو ئې په موټر پسې شالوره منډي کړې. مګر صوفي صادق له شا ورپسې نعري کړې او ټول ملګري ئې بېرته سره راغونډ کړل. د احتجاج پر ځائ ولاړي رېړۍ باندي لا هم هغسي لمبې بلېدې.
يو رېړيوال د اور اخستې رېړۍ زنځير ونيوو او رېړۍ ئې د ضلعي انتظامئې د دفترونو په خوا کش کړه. صوفي صادق پر مخه، ورپسې اور اخستې رېړۍ، بيا پنځه ملا تړلي په قطار کښي او بيا ورپسې څلورنيم پنځه سوه لښکر.... احتجاجي جلوس د ضلعي انتظامئې د دفترونو په لور تېز قدم واهه.
صوفي صادق به نعره کړه."ناروا پولس ناروا پولس".
رېړيوالو به په يوه ږغ ورغبرګه کړه."مخ ئې پراته شا ئې راته".
صوفي صادق."زاليم ووکمت هرام خور ووکمت".
رېړيوال."تو نالت تو نالت".
"زلي انتزامه زلي انتزامه"
"مړداباد مړداباد"
"ناروا پولس ناروا پولس".
"مخ ئې پراته شا ئې راته".
په لومړي ځل چي جلوس له څلور لاري راروانېدو، ټول رېړيوال غمزده غمزده او خشمېدلي وو ولي چي دوئ د خپل ګران ملګري رېړيوال په بدن سره لمبه تازه تازه ليدلې وه.. ښکاره خبره وه چي د دوئ ټولو زړونه پرې ودردېدل. ټولو ډېر په سنجيدګي سره د صوفي نعرو ته ځواب وايه خو دا وخت بېرته ورو ورو په جلوس کښي بدنظمي پېدا کېده. د ډېرو رېړيوالو له څهرو بېرته د سنجيدګۍ علامې ورکي شوې. په جلوس کښي بيا شپېلکي، ببکۍ، نعرې بغاري پېل شوې. د جلوس شالوره ملګرو بيا خپلي خولۍ او څادرونه په هوا کښي غورځول، بې ځايه ټوپونه وهل او بې ځايه خندا کول پېل کړل. يوازي د جلوس د مخ کسانو د صوفي د نعرو ځواب په سنجيدګۍ سره ورکاوو.
جلوس په تېښته د ضلعي انتظامئې د دفترونو په لور مزل کاوه. د رېړۍ په دړو او ټېرونو لا هم هغسي لمبې بلېدې، سوکي سکروټي ئې په سړک قطار ځني توئيدې. د ورځپاڼو، ريډيوګانو، ټيليويژنونو، او رسنيو رپورټرانو د جلوس په مخه او يو بل څنګ ته منډي ورسره وهلې د کېمرو سترګي ئې د جلوس په ګډونوالو نيولي وې. دا وخت پوليسان هم را رسېدلي وو. له وسله والو پوليسو ډک دوه موټران د جلوس په مخه او دوه شالوره په جلوس پسې روان وو.
جلوس دا وخت د ضلعي انتظامئې دفترونو ته ډېر نژدې شوی ؤ.
احتجاج کونکي رېړيوال به له اور اخستې رېړۍ سره د ضلعي انتظامئې په دفترونو ورننوزي او د پوليټيکل ايجنټ او اسيسټنټ پوليټيکل ايجنټ د دروازو په وړاندي به له رېړيوالو سره د ټرافيک پوليسو د ناروا روئې خلاف مظاهره کوي او له دې ناروا روئې څخه به د خلاصون ډاډګيرنه ترې تر لاسه کوي.
اور اخستې رېړۍ لا هم هغسي لمبې بلېدې. يوه رېړيوال تر زنځير نيولې د جلوس په مخ کشوله. د بازار ټول خلګ د دوکانونو او مارکيټونو په چتونو ورته ولاړ وو او د جلوس ننداره ئې کوله. دا په دې ښار کښي د خپل نوعيت يو ځانکړی احتجاج ؤ چي هيچ کله هم ښار والو نۀ وو ليدلی. دا وخت چي دفترونه ډېر نژدې وو نو ځکه په نعرو کښي يو ځل بيا ډېر زور او قوت پېدا شو.
صوفي صادق به نعره کړه."ناروا پولس ناروا پولس".
رېړيوالو به په يوه ږغ ورځواب کړه."مخ ئې پراته شا ئې راته".
صوفي،"ناروا پولس ناروا پولس".
رېړيوال،"مخ ئې پراته شا ئې راته".
"زلي انتزامه زلي انتزامه"
"مړداباد مړداباد"
"مړداباد مړداباد"
"پلټيکل اجنټ پلټيکل اجنټ"
"مړداباد مړداباد"
"اسټن پلټيکل اسټن پلټيکل"
"مړداباد مړداباد"
"ظالم ووکمت هرام خور ووکمت"
"تو نالت تو نالت".
"ناروا پولس ناروا پولس".
"مخ ئې پراته شا ئې راته".
په دغو نعرو کښي ځيني ډېري سپکي ښکنځاوي او پيغورونه هم اورېدل کېدل. د صوفي صادق د غاړو رګونه پړسېدلي وو. مخ ئې تک سور تک تور ؤ، غاړي ئې بوږي وې په ډېر تت ږغ ئې نعره تر خُلې وته.
رېړۍ والو د بېلا بېلو سياسي ګوندونو جهنډې/ بېرغونه په جلوس کښي را اخستي وو او ځينو لا پکښي له خپلو دسملونو او څادرونو څخه بېرغونه جوړ کړي وو او په جلوس کښي ئې رپول.
د ضلعي انتظامئې ټول دفترونه په يو ځائ، په يوه لويه سرکاري کلا کښي دننه وو. د کلا ډېر جګ دېوالونه او د دېوالونو پر سر اغزن تارونه جار وتلي وو. کلا ته يوه لويه په مننو مننو درنه له دړو جوړه دروازه سل وشل کلا پخوانۍ د فرنګي له وخته لګېدلې وه. د اوسپني سرئې پکښي جاروتلي، او درانۀ درانۀ د اوسپني نټونه پکښي لګېدلي وو. دغه لويه دروازه د بازار هغه سړک ته مخامخ ولاړه وه په کوم سړک چي جلوس را روان ؤ.
جلوس چي کوم وخت دروازې ته رارسېدو نو د پوليسو يو موټر د دروازې په يوه څنګ او بل ئې پر بل څنګ ولاړ ؤ.
صوفي صادق ورپسې اور اخستې رېړۍ بيا پنځه ملا تړلي او په هغو پسې څلورنيم پنځه سوه لښکر دروازې ته راورسېدل. له جذباتو او خشمه ډکو نعرو بغارو د غوږونو مکڼي پرې کولې. صوفي صادق هيڅ د پوليسو د موجودګي پروا ونۀ کړه. نېغ ئې پرې وړمنډه کړه دروازه ئې په لنګته ووهله مګر دروازې ته هيڅ باک ونۀ رسېدو. بيا ئې د دروازې يوه پله په غبرګو لاسونو پوري وهله خو دروازې بيا هم څه شور ونۀ خوړو، شالوره خشمېدلو ملاتړلو او رېړيوالو پرې رامنډي کړې دروازه ئې په يو وار پوري وهله خو دروازې هيڅ د خلاصېدو نوم نۀ اخستو. بيا له شالوره يو رېړيوال نعرې کړې."خوشي تشي زورونه مۀ وهئ، بالا وګورئ دروازې ته پنځه سېره کلف لګېدلی دی".رېړيوالو چي بره وکتل نو يقيناً هم دروازې ته ډېر غټ کلف لګېدلی ؤ چي لومړی دوئ د خپلي غصې له وجي په سترګو هم نۀ ؤ ليدلی.
پوليسو يو بل ته پټي پټي اشارې کولې او د رېړيوالو په ساده توب ئې خندل.
صوفي صادق د اور اخستې رېړۍ تر څنګ په يو دوه فټه جګ څلي پاس ودرېدو او په بوږو غاړو ئې تقرير پېل کړ.
"ښاغلو ملګرو ! زۀ د نن په دې کامياب احتجاج ــــــــــــ تاسو ټولو ته ــــــــــــ د زړۀ له تله شاباسی درکوم ــــــــــــــ زۀ ستاسي غيرت ستاسي همت ته سور سلام کوم ــــــــــ که د خدائ خوښه وه او خير ؤ ـــــــــــــــ تل به له دې ناروا سرکار سره ـــــــــــ په همت او اتفاق مقابله کوو. ګرانو ملګرو! تاسو دغه دي وليدل (د کلا بندي دروازې ته ئې د لاس په اشاره سره) چي دغه بزدل ـــــــــــــ بې غيرت ــــــــــــ او بې پښتو سرکار ـــــــــــ له موږ څخه تېښته وکړه ــــــــــــــــ خپلو دفترونو ته ئې ــــــــــــ برابر پنځه سېره کلف ولګاوه ــــــــــــــ خو زۀ دغه ناروا او بې غيرت سرکار ته په ډاګه وايم ــــــــــــــ چي تۀ به تر کومه له ما وتښتې؟ ـــــــــــــــ تر څو به راڅخه منډي کړې؟ ـــــــــــــــ تر څو ورځو به دفترونو ته کلفان ولګوې ـــــــــــــــ زۀ درپسې يم ـــــــــــــ زما دغه پنځه سوه لښکر شالوره درپسې دی ــــــــــــــ تر څو چي مي خپل مقام او خپل حقوق نۀ وي درڅخه تر لاسه کړي ــــــــــــــــ تر څو چي دي د دغه غل ـــــــــــــــ حرام خور ــــــــــــــ سولند پوليس ـــــــــــــ ناروا رويه د رېړيوالو سره نۀ وي برابره کړې ـــــــــــــ تر هغو به دغه لښکر درپسې وي. زۀ دغه بې غيرت سرکار ته په ډاګه وايم چي تۀ له موږ څخه په يو ځائ کښي هم ځان نۀ شې خلاصولائ ــــــــــــــ که اسمان ته خېژې تر پښو به دي رانيسو ـــــــــــ که پر مځکه ننوځې د سر تر وېښتانو به دي را کش کړو ـــــــــــ که دفترونو ته کلفونه ولګوې ـــــــــــ بله ورځ به د کور په دروازه در ننوزو...................زما دغه ( په مخامخ ولاړي مجموعې ئې لاس راوګرځاوو) څلورنيم پنځه سوه دپېچلو ځوانانو لښکر ..........." مګر چي په مخامخ مجموعه کښي ئې زير نظر وځغلاوو يو رېړيوال ملګری هم په نظر نۀ ورغی. مخامخ ولاړ خلګ ټول د بازار عام خلګ وو چي د اکثرو په څهرو خندا برېښېده. د مجموعې يو بل کونج کښي خو ځينو کسانو لا سم په کټ کټ خندل. صوفي صادق بلکل داسې احساس کړه لکه دی چي به يو نوميالی ټوکي وي او شاوخوا خلګ به ئې د مېلې تماشې د پاره سره راغونډ کړي وي.
او په دې خبره حق حيران شو چي د پنځه شپږ سوه کسانو په مجموعه کښي يو رېړيوال هم نۀ ليدل کېدو. ولاړ ټول خلګ د بازار سپين کالي، شويه شويه دوکانداران او ملازم طبعه، په رنګ شائسته او په جامه پاک خلګ وو چي پرې راټول وو او د دۀ په تقرير ئې خندا کوله.
صوفي صادق په څنګ ولاړ هغه رېړيوال ته مخ ور واړاوو کوم چي د اور اخستې رېړۍ زنځير نيولی ؤ. مګر دا وخت د رېړۍ په ځائ يوازي شپږ، اته د واوسپني ګاڼۍ، شپږ، اته د اوسپني سرئې او يو د اوسپني غټ زنځير په تورو ايرو کښي پراته وو. د پوليسو څلور واړه موټران سره د پوليس د نفري غايب وو.
صوفي صادق هم يو دم تقرير ختم کړ. له څلي کښته راټوپ شو. سر ئې کښته وځړاوو، په منډه د ولاړو نندارچيانو تر تخرګونو د مجموعې له منځه راووتو. خلګ لا نور له خندا پرې شنه شول.
صوفي دوې پښې خپلي وې او دوې ئې ورسره نوري کړې په خولو کښي سره تر پښو داسي لوند خيشت غرق ؤ لکه له تالابه چي به راختلی وي.
څنګه چي په وړومبي موړ راوګرځېدو د يو دوکان له تړې دوه رېړيوال ملګري مخي ته ورته راوغورځېدل.
" څۀ مخ دي تور ؤ صوفي؟ خو په شرمونو دي وشرمولو. نن خو د اتوار ورځ وه د اتوار په ورځ کله سرکاري دفترونه خلاص وي."
صوفي تر ځواب له مخه خپله پوښتنه ترې وکړه"هغه نور څلور، څلورنيم سوه ګيدړان څۀ شول؟"
ملګرو ورځواب کړه،"هغه وختي لا يو په يوه له شرمه پټ پټ وتښتېدل. د بازار ټول خلګ خبر دي چي نن اتوار دی او د اتوار په ورځ ټول دفترونه بند وي. بس يو موږ يو چي پرې را ډروهلي مو دي او يو هم په دې نۀ يو خبر"
صوفي د ملګري په دې خبره سخت سور شو."چي په تاسو څلورنيم، پنځه سوه کښي يو هم په دې نۀ ؤ خبر نو زما بيا کله مور افيسره وه يا مي پلار ملا ؤ چي اتوارونه او جمعې ئې رامعلومولې؟"
سبا د دغه احتجاج په اړه خبرونه په ورځپاڼو کښي په داسي ډول راغلي وو.
ورځپاڼه نوې تازه: سر ليک: په ابت کښي ځانګړی احتجاج
ابت(نامه نګار) پرون د اتوار په ورځ د سبزي رېړيو ښار ابت کښي د سبزي پلورونکو رېړيوالو د خپل نوعيت ځانګړی احتجاجي جلوس وکړ. دوئ د احتجاج په پېل کښي د خلګو د توجه حاصلولو د پاره يوه رېړۍ بند په بند ماته کړه او بيا ئې په يو بلي رېړۍ پيټرول توئ کړل. وشول دا چي اور ورکونکي رېړيوال تر رېړۍ له مخه په خپله اور واخست. چي بيا هغه ګړی روغتون ته ورسول شو. نورو رېړيوالو د بېلا بېلو سياسي ګوندونو بېرغونه راخستي وو. ځينو کسانو پکښي خپل د جېب دسملونه او څادرونه د لرګيو په سر پئيلي وو او سملاسي بېرغونه ئې ترې جوړ کړي وو. جلوس په پائ کښي د ضلعي دفترونو بندي دروازې ته د خپلو غوښتنو د وړاندي کولو وروسته ختم شو.
په دې ورځپاڼه کښي د دې احتجاج سره تړلی يو خبر داسي راغلی ؤ
سرليک: د صوفي صادق او نورو په خلاف ايف-ائي-آر درج شو
ابت (نماينده خصوصی) پرون د اتوار د ماښام په اتنيمي بجې د ابت ښار په منځنۍ تاڼه کښي يو ټرافيک پوليس الله ډيتا د صوفي صادق او نورو په خلاف رپورټ درج کړ. په رپورټ کښي په صوفي صادق او نورو الزام وئيل شوی چي هغوئ د هم دغي ورځي په احتجاجي جلسه کښي په پوليس او حکومت پسې سپکي سپوري او بېهوده ښکنځلي وکړې او حکومت ته سر عام وګواښېدل چي د قانون له مخي سنګين جرم دی. په ايف-ائي-آر کښي د دوئ د ژر تر ژره ګريفتارۍ غوښتنه شوې.
ورځپاڼه سباوون:سر ليک: رېړيوالو ښاروال ښه وخندول
ابت: (د سباوون استازی) پرون د اتوار په ورځ سبزي پلورونکو رېړيوالو چي شمېر ئې پنځه سوه ته رسېدو. د پوليسو او انتظامئې پر ضد احتجاجي جلوس را وايست. احتجاج کونکو جوړه کړې وه چي جلوس به پائ د ضلعي انتظامئې دفترونه محاصره کوي چي تر څو خپلي غوښتني په حکومت ومني. خو دا چي د اتوار ورځ وه نو ځکه احتجاج کونکي د دفترونو د کلا بندي دروازې ته ودرېدل او په پائ کښي له زور اوشرم څخه يو په يوه وتښتېدل. او ټولو ښاروالو ئې په سادګۍ ښه خندا وکړه.
ورځپاڼه انصاف: سرليک: څه خبر د کوم ګوند جلوس ؤ.
ابت(ببن) د يوې خبري ايجنسۍ،ببن، د خبر له مخي پرون د اتوار په ورځ په ابت ښار کښي سبزي پلورونکو رېړيوالو يو احتجاجي جلوس ايستلی ؤ چي پکښي د يوولسو بېلا بېلو سياسي ګوندونو بېرغونه رپول کېدل. مګر دغو يوولسو سياسي ګوندونو کښي هر يوه ګوند دا خبره رد کړه چي ګوا دوئ د رېړيوالو د احتجاج ملا تړ کړی ؤ. بله لا دا چي دغو سياسي ګوندونو په دې سخت خواښيني او خفګان سرګند کړی چي د دوئ د ګوندونو بېرغونه د ګوندونو د اجازې بغير په يو احتجاجي مظاهره کښي ورپول شول.
په دې ورځپاڼه کښي د احتجاج سره تړلی يو خبر دا هم خپور شوی ؤ.
سرليک: د سياسي ګوندونو د بېرغونو بې ځايه کارونکو ته دي سخته سزا ورکړائ شي.
ابت (د انصاف رپورټر) د پرون د احتجاجي جلوس په اړه د ابت د ټولو سياسي ګوندونو اتحادئې بيان جاري کړی چي د ابت يو سياسي ګوند هم د سبزي رېړيوالو د احتجاج ملاتړ نۀ کړی دی او نۀ ئې کوي. اتحادئې په دې خبره کلکه خواښيني څرګنده کړې چي رېړيوالو د بېلا بېلو سياسي ګوندونو بېرغونه له دېوالونو او د بجلۍ له تمبو په غلا راشوکولي وو او بيا ئې په لاسونو کښي په خپل جلوس کښي راخستي وو. دوئ له حکومت څخه غوښتنه کړې چي د سياسي ګوندونو د بېرغونو د تقدس خيال دي وساتل شي. او د رېړيوالو په ضد دي قانوني ګام واخستل شي.
ورځپاڼه جګړه: سرليک: زموږ لښکر پنځه سوه ملاتړلي لري
ابت (امندوست توکلي- د جګړې نمائنده) پرون د اتوار په ورځ د ښار سبزي پلورونکو رېړيوالو دښار په لويه څلور لاره کښي خپل يوه ملګري او يوې سبزي رېړۍ ته اور لګيت ورته کړ. دوئ غوښتل چي حکومت دي له دوئ سره مخامخ خبري وکړي که نۀ نو دوئ به سر عام د حکومت پر ضد د جګړې ميدان ته را ووځي. دوئ د خپل لښکر شمېر پنځه سوه ملا تړلي وښود.
په دې ورځپاڼه کښي د احتجاج په اړه يو خبر داسي خپور شوی ؤ.
سرليک: حکومت دي د هغو اتحاديو او انجمنونو په احتجاجونو بنديز ولګوي کوم چي له حکومت سره رجسټرډ نۀ دي.
ابت (د جګړې رپورټر) پرون د سبزي پلورونکو د احتجاج په اړه د ابت ښار د دوکاندارانو انجمن له حکومت څخه په کلکه غوښتنه کړې ده چي هغه دي د داسي ټولو غيرقانوني اتحادونو/انجمنونو په جلسو، جلوسونو او هر قسمه فعاليتونو بنديز ولګوي کوم چي له حکومت سره رجسټرډ نۀ دي. دوئ له حکومت څخه دا هم غوښتنه کړې ده چي د ياد شوي جلوس کسان دي ټول ګرفتار شي او له قانون سره سم دي سزا ورکړ شي که نۀ وي نو د دوکاندارانو انجمن ښه پوهېږي چي د رېړيوالو علاج په خپله وکړي.
ورځپاڼه خاموش: سرليک: د سبزي فروشانو جلوس
ابت : (نمائنده خاموش) پرون د سبزي فروشانو جلوس د بازار په سړکونو ګشت وکړ او په پائ کښي د ضلعي انتظامئې د دفترونو دروازې ته مخامخ ختم شو
ورځپاڼه مسلم: سرليک: راځئ چي ټول دال وخورو
ابت (عابدالله زاهد) پرون د سبزي او مېوه پلورونکو د هړتال له وجي هيچا هم ونۀ کولائ شو چي په بازار کښي سبزي او مېوه پېدا کړي. ښار وال په سبزي پسې تر ماښامه کړانده ګرځېدل. تر غرمې له مخه په قصاب خانو کښي غوښه هم ختمه شوه. پاته ښاروالو ټولو د دال په پات ګزاره وچلوله.
په دې ورځپاڼه کښي د احتجاج په اړه يو خبر داسي خپور شوی ؤ.
سر ليک: اسلام هيڅ وخت هم د ځان وژني او ځان سوځوني اجازه نۀ ورکوي
ابت (نمائنده مسلم) پرون د اتوار په ورځ د سبزي پلورونکو د احتجاج په اړه چي يو رېړيوال په کښي خپل ځان ته اور ورکړی ؤ. د ابت ښار د علما او مشائخ اتحادئې بيان جاري کړی چي اسلام په هيڅ قسمه حالاتو کښي هم د ځان وژني او ځان سوځوني اجازه نۀ ورکوي. دوئ وئيلي چي دا د شريعت له مخه يو ډېر ناروا او حرام کار دی چي د علما او مشائخ اتحاديه ئې په کلکه غندنه کوي. علما او مشائخ اتحادئې له حکومت څخه غوښتنه کړې چي د دې ناروا کار دي مخ نيوی وکړي. او د دې ستري ګنا مرتکب ته دي سزا ورکړ شي.
ورځپاڼه اقتصاد: سرليک: د کروند ګرو د کال خواري خړو اوبو يوړه
ابت(نمائنده اقتصاد) پرون د اتوار په ورځ د سبزي پلورونکو رېړيوالو د احتجاج له وجي سبزي منډۍ ته راوړل شوې سبزي او مېوې ټولې په بوجيو او کرېټونو کښي پرتې پرتې ورستې او بوئيني شوې. د بزګرانو د پره کال خواري خړو اوبو يوړه. رېړيوالو د خپل احتجاج هيڅ پيشګي اعلان نۀ ؤ کړی. ځکه نو کروندګرو د نور کله په څېر په دغه ورځ هم سهار وختي په لوډونو لوډونو سبزۍ او مېوې د ښار منډۍ ته راورسولې. مګر سبزۍ او مېوې د اتوار ورځ ورپسې شپه په بوجيو کښي بندي پاته شوې. درېيم سهار کروندګر په تش لاس کورونو ته ستانه شول.
ورځپاڼه خپلواکي: سرليک: کاش که د بازار ټول سړکونه د تل لپاره داسي له سبزي رېړيو خلاص شي
ابت (د خپلواکي نمائنده) پرون د اتوار په ورځ د سبزي پلورونکو رېړيوالو د احتجاج له وجي د بازار واټونه د حيرانتيا تر حده له سبزي رېړيو پاک شوي وو. د ابت بازار د لندن تر بازار ښکلی ښکارېدو. په دغه ورځ د بازار ټولو دوکاندارانو، پياده خلګو، سکوټروانانو، او موټروانانو له بازار څخه خوند واخستو. په ټول بازار کښي تر ماښامه يو سړک هم د ټرافيکي خنډ له وجي ونۀ درېدو.
ورځپاڼه مزدور: سرليک: که حکومت زموږ ژړا وانۀ وري نو موږ به تر دې سخت احتجاج ته اړ شو.
ابت (قربان شاه مزدورـــــــ رپورټر) پرون د اتوار په ورځ د ښار سبزي پلورونکو رېړيوالو د ټرافيک پوليس له دوئ سره د ناروا روئې پر ضد احتجاجي جلوس او جلسه وکړه. احتجاج د يو رېړيوال له ځان سوځوني پېل شو. د نژدې پنځه سوه بې وزله رېړيوالو جلوس چي يوې رېړۍ ته ئې اور ورکړی ؤ او د بازار په واټونو ئې ګرځوله، له حکومت څخه غوښتنه کوله چي د ټرافيک پوليسو رويه دي له رېړيوالو سره روغه کړائ شي. که نۀ نو دوئ ټول غربت ځپلي خلګ به تر دې هم سخت احتجاج کولو ته مجبور شي.
د هم دې ورځپاڼي په اد اريه کښي د احتجاج په اړه ليکل شوي وو
دا چي حکومت د اولس د هر وګړي مور و پلار ګڼل کېږي نو ځکه دا د حکومت او حکومتي ذمه دارانو فريضه جوړېږي چي دوئ د هري غريبي، محنت کشي، او مزدوري طبقې فرياد په سنجيدګي سره واوري او د دوئ زېرمه وکړي. په اداريه کښي حکومت ته تجويز ورکړ شوی چي رېړيوالو ته دي د بازار په يوه بله څنډه کښي په پراخو پلاټونو او روډونو پاخه ځايونه ورکړ شي چي هلته دوئ په يو ځائ په قراره خپله روزي جوړولائ شي. په داسي صورت به هم ښار د ټرافيکي ستونځو څخه خلاص شي هم به رېړيوال د پوليس د زور زياتي څخه خلاصون پېدا کړي. او د مستقبل حل په توګه دي په خاص ځائ نوی سبزي مارکېټ جوړ کړل شي، هر رېړيوال ته دي پکښي يو يو دوکان ورکړ شي چي دوئ هم يو ورځ په عزت د روزي ګټلو جوګه شي. په اداريه کښي له حکومت څخه د سوځېدلي رېړيوال د علاج زېرمه کولو هم او د هغه د کورنۍ سره د مالي مرستي کولو هم غوښتنه شوې وه.
اوس د احتجاج دوې مياشتي شوې. نوري ټولي سبزي رېړۍ په هم هغه زاړه حالت د بازار په واټونو ګرځي. د پوليسو رويه لا ورسره د دښمنۍ شوې ده. خو صوفي صادق او د هغه رېړۍ د بازار په يو پلو کښي هم نۀ تر سترګو کېږي.